Mes bisedës ku tregohen eksperienca personale, qofshin këto edhe me njerëz të dashur, Ermira Çausholli, moderatorja e “E ardhmja është vajzë” në Klan Plus, ndau kujtimin e saj. Fëmijëria e hershme ‘kyç’ brenda saj edhe momentet më të ëmbla e gazmore, që duket sikur dalin prej përrallave e tregimeve të gjyshes. Por shpeshherë, janë vetë gjyshet që krijojnë këto kujtime të paharrueshme për nipërit e mbesat.
Ermira Çausholli: Në fakt edhe unë e kam një moment me njërën prej gjysheve të mia e cila vinte të më shikonte kur këndoja kur isha e vogël. Kam kënduar edhe unë, kur kam qenë e vogël ama, më vonë nuk më lejuan më, nuk e di pse, nuk premtoja ndoshta për t’u bërë e madhe dhe e lanë aty.
Por ajo vinte më ndiqte kur unë këndoja në skenë, kam qenë 4-5 vjeç kur kam kënduar për herë të parë në qytetin e Korçës dhe kam qenë një fëmijë i vogël, më i vogli nga të gjithë të tjerët dhe mikrofoni ishte në një standard të caktuar për një gjatësi të caktuar. Unë përveçse isha më e shkurtër edhe se moshatarët e mi, edhe se ata më të mëdhenjtë që këndonin, dola në skenë dhe mikrofonin e kisha lart. Ndërkohë, gjyshja ime nga rreshti i parë, çohet dhe thotë: “Uljani mikrofonin çupës!”/tvklan.al/